單身即地獄｜宋智雅被爆著名牌假貨 內地網民特別激動：滾出中國
Netflix韓國實境節目《單身即地獄》已播出完結篇，12名參加者人氣急升，當中有「火辣版Jennie」之稱嘅宋智雅IG粉絲由節目播出前約46萬升至351萬（截至19日12時），亦被韓國知名綜藝節目爭相邀請作嘉賓。不過近日宋智雅被踢爆一直使用假貨，及後宋智雅發出親筆手寫信承認此事與道歉。
《單身即地獄》搵嚟12名單身男女於地獄島上尋覓另一半，hoka shoes for women歷時9日8夜，過程中唔可以問及對方年齡同職業，只有喺配對環節中成功配對，先可以去天堂島入住豪華酒店總統套房享受浪漫約會，同時傾計內容唔受限制；宋智雅就由頭帶到尾，為天堂島常客，最後仲吸引金賢中、崔時訓、車炫承揀佢作出配對，而宋智雅就揀咗一直以嚟對佢一心一意嘅「小狗」金賢中。
本身係美妝YouTuber嘅宋智雅不論喺《單身即地獄》入面定社交平台都會大曬名牌，日前就有網民提出證據指控宋智雅用假貨，包括其四葉草頸鏈、Jennie同款復古上衣、針織上衣及Logo平口上衣等等，款式除咗同官網顯示嘅有所出入，當中Logo平口上衣被發現品牌根本無出過呢個款，相反喺其他網店就能以1萬6千韓元（約105港元）買到同一款式，宋智雅最終發親筆信承認部份單品的確係假貨，又將IG有關照片刪去；事件釋出後，引起世界各地網民熱議，有網民仲發現金賢中已Unfollow宋智雅。
另外，宋智雅活躍於中國市場，設有中國bilibili、小紅書及抖音帳號，網民近日翻出宋智雅喺中國相關代言業配價，據悉當中小紅書圖文嘅1月報價已經係約56萬至70萬港元，指經紀公司獅子開大口，而被爆出假貨事件後，中國網民似乎對宋智雅感到反感，微博內仲衍生咗一個「宋智雅滾出中國」Hashtag。
